Jesus Christus se Hemelvaart

Jesus Christus se Hemelvaart • Sermon • Submitted 2 years ago

0 ratings

· 29 views

As gevolg van Jesus Christus se opstanding en hemelvaart, glo ons dat ons ook eendag sal opstaan en in ewige gemeenskap met Hom sal tree.

Notes

Transcript

Sermon Tone Analysis

Emotion

Language

Social

View more →

Titel: Wat beteken Jesus Christus se hemelvaart vir ons?

Tesis: As gevolg van Jesus Christus se opstanding en hemelvaart, glo ons dat ons ook eendag sal opstaan en in ewige gemeenskap met Hom sal tree.

********************************************************************************

Inleiding

Dit is baie hartseer dat belangrike Christelike gebeurtenisse, soos hemelvaart, nie meer die nodige aandag geniet, soos ander gebeurtenisse nie. Ons weet almal, dat wanneer daar nie meer gefokus word op iets spesifieks nie, dit mettertyd vergeet word. So is dit maar besig om met hemelvaart ook te gebeur. Waarom is hemelvaart vir ons belangrik? Ter inleiding, is dit belangrik om ‘n agtergrond te hê, om die gebeure van hemelvaart te begryp.

Liewe gemeente, die verhaal van Jesus Christus begin in die hemel, nog voor die grondlegging van die aarde en dit eindig wanneer Hy die aarde verlaat om na die hemel terug te keer. Die verhaal van Jesus Christus het begin met inkarnasie, met ander woorde, Sy menswording, en eindig met Sy verhoging as die Koning van Konings. Dit begin met verwagting en eindig met voleinding. Dit het begin met die Seun van God wat uit 'n maagd gebore is, na die aarde neergedaal het, en dit eindig met die Seun van God wat uit die dood opgewek is en wat na die hemel opgevaar het. Die storie het begin met hoop wat nie gerealiseer is nie en eindig met hoop wat ten volle verwesenlik is. Dit het begin met 'n belofte en eindig met 'n vervulling en 'n nuwe belofte.

Die Hemelvaart van Jesus Christus, moes 'n opwindende ervaring gewees het. Dit moes die verstand te bowe gegaan het om Jesus Christus in die eerste plek in lewende lywe te kon ervaar, en tweedens, so ‘n wonderlike gebeurtenis soos Sy hemelvaart, te kon beleef. Waarom dan so? Al hierdie gebeure, is ‘n bevestiging aan ons dat Jesus Christus, as God geïnkarneer is. Dit wil sê, dat Hy volkome God was in Sy menswording. Dit bevestig aan ons, dat Hy opgestaan het en dat Hy opgestaan het en dat Hy lewe. En juis hierom, verstaan ons die volheid van die Ou Testament en al die profesieë wat vervul is. Al ons twyfel is weg en ons geloof in Jesus Christus is solied.

Dit is hartseer dat ‘n gebeurtenis, soos Jesus Christus se hemelvaart, so min betekenis vir baie mense geword het, en dat dit as te ware eenkant toe geskuif word. Tot 'n mate word daar min oor Hemelvaartsdag gedink omdat dit, ten minste in Suid-Afrika, anders as Kersfees en Goeie Vrydag, nie 'n openbare vakansiedag is nie. Dit val nie op 'n langnaweek nie. Dit is ook 'n dag wat, anders as Kersfees en Paasfees, nie feitlik universele herdenking in die Christelike kringe gegee word nie. Nietemin, selfs al word daar min aandag aan hierdie belangrike gebeurtenis gegee, wil ek graag hê dat ons vanoggend met alle erns sal na dink oor die belangrikheid van hierdie gebeurtenis wat plaasgevind het. Wat hou die hemelvaart vir ons as gelowiges in? Is dit werklik vir ons so ‘n belangrike gebeurtenis? U sien geliefdes, as ons as gelowiges, hierdie gebeure reg verstaan en die belangrikheid daarvan begryp, dan sal ons weet en verstaan dat die hemelvaart van Jesus Christus een van die belangrikste gebeurtenisse in Sy lewe asook in Sy bediening is en was.

Terwyl ons die Nuwe-Testamentiese hemelvaartverslae bestudeer, soos ons dit vind in Markus 16:19–20; Lukas 24:50–53 asook in Handelinge 1:6–11, is dit noodsaaklik om die Ou-Testamentiese hemelvaartprofesieë ook in gedagte te hou. Want die gebeurtenis rondom Jesus se hemelvaart, word baie duidelik geprofiteer in gedeeltes soos Psalm 68:18; Psalm 110:1; asook baie spesifiek in Daniël 7:13–14. om slegs ‘n paar te noem. In meer spesifieke studies oor hierdie gedeeltes leer ons verskeie betekenisse rondom die gebeurtenis van Jesus se hemelvaart. Dis juis daarom dat ons, ons primêre teks van vanoggend, Handelinge 1:6-11, gaan vergelyk met ander gedeeltes, om vier belangrike hemelvaartwaarhede uit te wys, sodat die erns Jesus se hemelvaart begryp en verstaan kan word.

1. Die eerste waarheid is juis dat ons moet onthou dat Jesus Christus die Koning is.

Ten diepste gaan die hemelvaart oor die troonbestyging van Jesus Christus. Dus, terwyl ons na dink oor die hemelvaart , moet ons dit doen om die Koning van van alle konings te onthou. Met die opteken van die werklike gebeurtenis, skryf Lukas: " En nadat Hy dit gesê het, is Hy opgeneem terwyl hulle dit sien; en ‘n wolk het Hom voor hulle oë weggeneem.” (vers. 9). In Lukas se vroeëre verslag in Lukas 24:51, skryf hy die volgende: “En terwyl Hy hulle seën, het Hy van hulle geskei en is in die hemel opgeneem.” Ook skryf Markus, op sy eie manier die volgende in Markus 16:19; “Nadat die Here dan met hulle gespreek het, is Hy opgeneem in die hemel en het gaan sit aan die regterhand van God. U sien geliefdes, Markus se beskrywing is belangrik, want in antieke tye was die regterhand van 'n koning 'n plek van voorreg en gesag. 'n Troon sou dikwels aan die regterkant van 'n koning geplaas word, waar 'n mederegent of 'n prins sou sit, wat sy gesag oor die mense onder die hoofskap van die koning aandui. 'n Sitplek aan die regterhand van God is 'n simbool van goddelike en koninklike gesag. Gelowiges met 'n ware kennis van die Bybel verstaan die betekenis van Jesus Christus se hemelvaart. Hierdie gebeurtenis dui op Jesus Christus se troonbestyging. Hy het opgevaar na Sy Vader, om Sy plek op die troon in te neem. Daniël het baie spesifiek hierdie einste gebeurtenis geprofeteer in Daniël 7:13-14: “Ek het gesien in die naggesigte, en kyk, met die wolke van die hemel het Een gekom soos die Seun van ‘n mens, en Hy het gekom tot by die Oue van dae, en hulle het Hom nader gebring voor Hom. (14) En aan Hom is gegee heerskappy en eer en koningskap; en al die volke en nasies en tale het Hom vereer; sy heerskappy is ‘n ewige heerskappy wat nie sal vergaan nie, en sy koninkryk een wat nie vernietig sal word nie.

Daar is sekere vorme van teologie wat daarop wil dui dat Jesus Christus nie vandag alreeds op Sy troon sit nie. Baie glo nog dat dit iets is wat wel nog moet gebeur. Hulle glo dat dit eers met die wederkoms sal wees, wanneer Hy Sy troon sal inneem. Hierdie kan egter nie waar wees nie. Waarom? Daniël was baie duidelik dat aan die Seun van die mens, Jesus Christus, heerskappy en eer, asook ‘n koningskap gegee is, toe “hy gekom het na die Oue van Dae. Hierdie “oue van dae” dui glad nie op, wanneer Hy, Jesus Christus, die Oue van Dae, na die aarde sal terugkeer nie! Toe Jesus Christus, na Sy Vader opgevaar het, en aan die Regterhand van God gaan sit het, het Jesus Christus Sy Ewige Troon ingeneem. Daarom is Hy die Koning van alle konings.

Liewe gemeente, terwyl ons saam in die kerk bymekaarkom vir aanbidding, wanneer ons in die wêreld is en na ons werksplekke gaan deur die week, maar ook as ons saam met familie en vriende vir sosiale geleenthede bymekaarkom, moet ons altyd onthou dat Jesus Christus op Sy troon sit. Die bevestiging hiervan kry ons in Psalm 103:19; “Die HERE het sy troon in die hemel gevestig, en sy koninkryk heers oor alles”.

Liewe kind van die Here, ek wil u vanoggend aanmoedig om goeie moed te hou terwyl ons onthou en weet dat Jesus Christus die Koning is. Terwyl ons werkloosheid, of hartseer, of siekte, of onsekerheid, of enige bekommernis in die gesig staar, is Jesus Christus op Sy troon en regeer Hy oor ons lewe. “En ná verloop van tyd het ek, Nebukadnésar, my oë na die hemel opgeslaan, en my verstand het in my teruggekeer, en ek het die Allerhoogste geloof en Hom wat ewig lewe, geprys en geëer, wie se heerskappy ‘n ewige mag en wie se koningskap van geslag tot geslag is. (35) En al die aardbewoners word as niks geag nie, en na sy wil handel Hy met die leër van die hemel en die bewoners van die aarde, en daar is niemand wat sy hand kan afslaan en vir Hom kan sê: Wat doen U nie? (Daniël 4:34–35).

Ek lees nou die dag die volgende getuienis in ‘n artikel van ‘n persoon wie se vrou tans behandeling vir stadium 3 kanker ondergaan. Hulle besin oor sommige van die lesse wat tydens die hele proses geleer is en op 'n stadium het hy die volgende gesê: "Ons het geleer dat dieselfde God wat by ons was voordat my vrou kanker gekry het, dieselfde God is wat met ons is noudat sy kanker het." Wat probeer ek sê? Hierdie is die teologie van die hemelvaart! Naamlik, dat Jesus Christus op Sy troon is en dat die gebeure van die hele mensdom vir Sy doeleindes en tot Sy voordeel en heerlikheid plaasvind. Hy is die regerende Koning. En dit bring my by die volgende hemelvaart waarheid, naamlik;

2. Dat ons Jesus Christus as die Koning Verkondig.

Die dissipels het die terrein van die hemelvaart genader met hul eie voor opgestelde idees in gedagte. Kyk wat sê vers 6; “Die wat bymekaargekom het, vra Hom toe en sê: Here, gaan U in hierdie tyd die koninkryk vir Israel weer oprig? Selfs op hierdie stadium, ten spyte van drie jaar se onderrig, het hulle, die dissipels, steeds nie die hemelvaart gebeurtenis heeltemal verstaan nie. Hulle het etnosentries gebly en gedink. Hierby bedoel ek, dat hulle hul eie kultuur as ‘n verwysings raamwerk gebruik het om ander se kulture, gedrag en oortuigings asook mense te beoordeel. In plaas daarvan om eerder die standaarde van Jesus Christus asook die besondersheid wat Hy daar gestel het, te gebruik. Die dissipels het dus eerder 'n fisiese manifestasie van Jesus Christus se koninkryk verwag. Maar, Jesus sou egter nie toelaat dat hulle aandag van hulle opdrag afgelei bly nie. Luister wat sê Hy in verse 7 & 8; “En Hy antwoord hulle: Dit kom julle nie toe om die tye of geleenthede te weet wat die Vader deur sy eie mag bepaal het nie; (8) maar julle sal krag ontvang wanneer die Heilige Gees oor julle kom, en julle sal my getuies wees in Jerusalem sowel as in die hele Judéa en Samaría en tot aan die uiterste van die aarde.

Geliefdes, die hemelvaart, asook die troonbestyging van Jesus Christus, is nie 'n waarheid om slegs vir eie persoonlike gewin te eien nie! Nee, dit is 'n waarheid wat juis deur die kerk en elke liewe Christen uit gebasuin moet word na 'n wêreld wat 'n welwillende Koning nodig het. Dit is in werklikheid net as gevolg van Jesus Christus se gesag as Koning dat ons hoop het in ons opdrag wat Hy daar gestel het. Dit is juis omdat alle gesag oor hemel en aarde aan Hom gegee is, dat ons dissipels van alle nasies kan maak volgens die opdrag in Matteus 28:18–20. As ons 'n burger van die koninkryk van die hemel is, is ons ook 'n ambassadeur vir Jesus Christus die Koning. Nou, terwyl ons nadink oor die glorieryke waarheid van die hemelvaart, moet ons, ons opdrag onthou, en dit is om hierdie waarhede te verkondig aan 'n wêreld wat 'n Koning nodig het. Waar daar geen Koning of Heerser is nie, is mense geneig om te doen wat ook al reg is in hul eie oë. Dit eindig nooit goed nie. Ons moet hierdie goeie nuus na hierdie verlore wêreld neem en uit basuin dat daar 'n goeie Koning is wat bereid is om ons sondes te vergewe en ons as Sy eie te ontvang. Ons moet die waarheid verkondig dat om daardie Koning te weerstaan, rebellie van hoogste orde en dwaasheid van die diepste soort is.

Die Koning, Jesus Christus, is genadig en lankmoedig, maar Hy sal nie vir ewig toelaat dat Sy gesag weerstaan word nie. Daar gaan en kom 'n dag waarop die Koning Jesus Christus Sy toorn aan die wêreld sal openbaar, en diegene wat Sy gesag weerstaan het, sal op die pad vergaan terwyl Sy toorn vinnig ontvlam. Daar is egter hoop vir Sy kinders. “Kus die Seun, dat Hy nie toornig word en julle op die weg vergaan nie; want gou kan sy toorn ontvlam. Welgeluksalig is almal wat by Hom skuil! (Psalm 2:12). Die wêreld moet van ambassadeurs van die koninkryk hoor dat die Koning van alle gesag aan hulle die evangelie van vergifnis en versoening bied deur Sy dood en Sy opstanding.

3. Die derde waarheid is ons Hoop op Jesus Christus die Koning.

Toe Jesus in die wolke verdwyn het, het die dissipels absoluut radeloos gestaan. “En toe hulle nog stip na die hemel kyk terwyl Hy weggaan, staan daar twee manne in wit klere by hulle, (11) wat sê: Galilése manne, waarom staan julle en kyk na die hemel? Hierdie Jesus wat van julle opgeneem is in die hemel, sal net so kom soos julle Hom na die hemel sien wegvaar het. (vers.10 &11). Het hulle nie geluister na wat Hy sopas gesê het oor getuies nie? Die opdrag was nie om te bly en hopeloos na die hemel te kyk nie, NEE, maar om hoopvol uit te gaan en dissipels oor al die nasies van die aarde te maak. Hoekom? Want Hy sou by hulle wees, in die Persoon van die Heilige Gees, tot aan die einde van die eeu. Wat ‘n wonderlike waarheid!

Die dissipels het nie daarin geslaag om die groot troos wat die hemelvaart aan hulle verskaf het, te begryp nie. Jesus het vroeër in Johannes 14:18 vir hulle gesê: “Ek sal julle nie as wese agterlaat nie; Ek kom weer na julle toe.” En dan sê Hy weer in verse 27 & 28 verder; “Vrede laat Ek vir julle na, my vrede gee Ek aan julle; nie soos die wêreld gee, gee Ek aan julle nie. Laat julle hart nie ontsteld word en bang wees nie. (28) Julle het gehoor dat Ek aan julle gesê het: Ek gaan weg en Ek kom weer na julle toe. As julle My liefgehad het, sou julle bly wees dat Ek gesê het: Ek gaan na my Vader, omdat my Vader groter is as Ek.” Toe Hy vir hulle sê dat Hy weggaan, was hulle met droefheid vervul, maar Hy sê vir hulle: “Maar omdat Ek dit vir julle gesê het, het droefheid julle hart vervul. (7) Maar Ek sê julle die waarheid: Dit is vir julle voordelig dat Ek weggaan; want as Ek nie weggaan nie, sal die Trooster nie na julle kom nie; maar as Ek weggaan, sal Ek Hom na julle stuur;” Ons leer hier dat die Heilige Gees - die Helper of Trooster - sou in 'n kort termyn oor die dissipels kom, maar toe hulle Jesus na die hemel sien opvaar het, was hulle met ‘n amper verlammende vrees vervul. Dit het die verskyning van engele geneem om hulle te herinner dat die hemelvaart 'n goeie gebeurtenis was, en hulle kon troos kry in die heerskappy van Jesus uit die regterhand van die Vader en die gevolglike koms van die Heilige Gees.

Geliefdes ons moet weet hoe dit is om na Jesus Christus se wederkoms te verlang. Met ander woorde, om te verlang om te wees waar Hy is. Daar is niks noodwendig verkeerd met hierdie verlange nie. Paul het dit self gesê: “Want ek word van weerskante gedring: ek het verlange om heen te gaan en met Christus te wees, want dit is verreweg die beste; (24) maar om in die vlees te bly, is nodiger om julle ontwil.”

Paulus het verlang om vry te wees van sy sondige liggaam, en daar is tye, ongetwyfeld, wanneer ons almal daardie verlange voel. Ja, ons uiteindelike hoop is die finale opstanding, maar selfs nou kan ons lewens van groot hoop leef, want Jesus Christus is Koning. Ons kan met vertroue ons opdrag uitvoer, want Hy sal toesien dat Sy wil bereik word. Ons kan die beproewinge van die lewe trotseer, want ons weet dat alles uit Sy vriendelike hand van voorsienigheid voortspruit. Die hemelvaart verskaf alle rede vir ons om te volhard en om vrymoedig te wees in die Christelike diens met die wete dat ons arbeid nooit tevergeefs in die Here is nie. En daarom verwag ons Jesus Christus die Koning.

4. Die vierde en laaste waarheid is dat ons Verwag Jesus Christus die Koning.

Uiteindelik, selfs terwyl hulle met 'n gevoel van oorweldiging gestaar het na die plek in die wolke waar Jesus van hulle oë weggeneem is, het die engele 'n wonderlike belofte gelewer: “wat sê: Galilése manne, waarom staan julle en kyk na die hemel? Hierdie Jesus wat van julle opgeneem is in die hemel, sal net so kom soos julle Hom na die hemel sien wegvaar het. (vers 11).

Hier het die engele vir die dissipels gesê dat Jesus eendag sou terugkeer. Dit was nie vir die dissipels belangrik om te weet wanneer hy sou terugkeer nie, net dat Hy sou terugkeer. Die wederkoms van Jesus wat hier voorspel is, is 'n terugkeer op dieselfde manier as wat hy vertrek het. Dit wil sê, fisies en ook sigbaar. Daar is sekere segmente in die kerk vandag wat 'n toekomstige asook ‘n liggaamlike wederkoms van Jesus Christus, na die aarde ontken, maar hierdie teks leer ons die waarheid rondom die werklikheid baie duidelik.

Die Nuwe Testament leer die realiteit van die wederkoms, maar dit staan nie daaroor nie. In plaas daarvan beklemtoon die Nuwe Testament dat die opgestane en opgevaarde Jesus Christus selfs nou as Koning oor die aarde regeer. God wil nie hê dat ons so gefikseer is op die toekomstige wederkoms van Jesus dat ons nalaat om te doen waarvoor Hy ons nou roep nie. Hy wil hê dat ons oortuig moet wees dat Jesus Christus selfs nou regeer, sodat ons die evangelie met vrymoedigheid sal verkondig en die oes daaruit sal verwag.

En uiteindelik waarborg die hemelvaart van Jesus Christus Sy wederkoms deur ons te verseker dat dit wel gaan gebeur. Kyk weer na vers 11b; "Hierdie Jesus wat van julle opgeneem is in die hemel, sal net so kom soos julle Hom na die hemel sien wegvaar het.” Wat 'n wonderlike gebeurtenis om na uit te sien my geliefdes. Praat oor iets wat die moeite werd is om te vier. As ons al die pad kan gaan van die geboorte van Jesus Christus tot en met die hemelvaart van Jesus Christus, van Sy koms tot Sy vertrek, sal ons 'n prentjie van die hele werklikheid rondom die wederkoms van Jesus Christus kry. Jesus Christus word verhef deur Sy hemelvaart, gekroon as Here. Hy stuur die Heilige Gees. Hy begin om vir ons ‘n ewige tuiste voor te berei. Hy neem die posisie van die Hoofpriesterskap van die kerk aan. Hy verslaan Satan. Hy gee Sy evangelisasie en bedienings werk aan sy volgelinge oor. Hy begin die geseënde werk van voorbidding namens Sy kinders en staan gereed om op God se volmaakte tyd terug te keer. Ja, in die woorde van Paulus aan die Korinthiërs, "Hy wat ryk was, het arm geword deur al die rykdom van die hemel te ontdoen, sodat ons deur sy armoede ryk kan word." So as ons hierdie jaar by Kersfees kom, kan ons miskien aangaan na die einde van die storie, verby die begin kom en reflekteer oor alles wat Hy bereik het.

Nietemin is die toekomstige, liggaamlike wederkoms van Jesus Christus aan die einde van die eeue 'n waarheid wat die Bybel leer, en ons moet dit verkondig as waarheid. 'n Dag kom – ons weet nie wanneer nie – wanneer Jesus Christus na die aarde sal terugkeer. Hy sal die dooies opwek en die finale oordeel oor die hele mensdom sal Hy uitspreek en beklemtoon. Op daardie tydstip sal hy Sy volk (die skape) van Sy vyande (die bokke) skei, en die skape sal die ewige lewe binnegaan terwyl die bokke aan die ewige straf oorgegee sal word.

Afsluiting:

Die hemelvaart herinner ons aan die waarheid en realiteit van die wederkoms. Dit gee ons hoop, as gevolg van Jesus se opstanding en hemelvaart, dat ons ook eendag sal opstaan en in ewige verhouding met Hom sal tree.

Terwyl ons dus aan hemelvaart dink, laat ons opnuut onthou dat Jesus Christus Koning is; tweedens, moet ons Hom as die Koning verkondig; derdens, ons hoop op Hom as die Koning; en, vierdens, ons verwag Sy terugkeer as Koning om al Sy vyande te oorwin en, in Sy volheid, die ewige koninkryk te ontvang.

Amen.

Vader, ons dank U vir u waarheid. U Woord stel ons nooit teleur nie. Dit oorweldig ons altyd. Dit is so konsekwent, so onaantasbaar, so duidelik goddelik in alles wat dit bevestig. Maar ons verstaan diegene op pad na Emmaus wat gesê het: "Het ons harte nie in ons gebrand toe Hy met ons gepraat en die Skrif aan ons verduidelik het nie." Ons dank u vir u waarheid. Dankie vir die werk van Christus. Ons wil wees soos daardie volgelinge wat aanbid het, wat met groot vreugde gehoorsaam, en wat voortdurende onophoudelike lof vir hierdie Gawe van gawes, ons Verlosser, aanbied. Vir al die wonders van hierdie ervaring vanoggend en vir die vreugde van ons tyd saam, ons dank u in Sy naam.